Hoogtyd

Na amper 4 maande sonder enige aktiwiteit op my Blog kan ek verstaan as gereelde lesers gefrustreerd is met my. Indien julle op hoogte wou bly van my aktiwiteite deur die Blog te lees glo ek daar is nou baie mense wat geen idee het van hoe dit met my gaan nie... So, om mee te begin, 'n opsomming van die laaste paar maande... (Ek verdeel die inligting onder opskrifte so indien jy nie alles wil lees nie, lees net die dele wat saakmaak.)

Akademie (die rede hoekom ek afterall hierheen gekom het – ek kon McDonalds en gewig in Bloemfontein opgetel het...)

Na die vorige post het die semester tot 'n einde gekom. Eerlikwaar, ek is nie seker waar die laaste maand of so van die semester heen gegaan het nie. Ek onthou sulke traumatiese flashbacks wat te doen gehad het met lazercutters wat 4am die oggend nie werk nie, en dosente wat dreig om mense te dop en huistoe te stuur. Die dop idee is nogal skrikwekkend aangesien Citibank nie gunstig kyk op mense (met studentelenings in Amerikaanse dollars) wat nie hulle graad voltooi nie. Maar, tenspyte van al die dinge het ek darem die semester deurgekom, nogal met 'n B gemiddeld, wat heel goed is. Aangesien ons sisteem hier verskil van die SA sisteem wil mens graag nie 'n C of laer kry nie. Om te verduidelik, hier werk ons met 'n GPA (Grade point average) wat uit 5 tel, en al jou vakke vanaf die eerste jaar tot aan die einde word gebruik om dit te bepaal. Vir die eerste semester het ek 'n GPA van 3.9 gehad. Hierdie semester was my GPA 4.2, met die verhoging te danke aan beter vordering in studio (ontwerp klas) – asook miskien net 'n dosent wat minder mal was as die vorige een... (Ek bedoel mal nie negatief nie, aangesien omtrent almal hier bietjie af is.) Soos gemiddeldes werk is my GPA dus nou 4.1 (so persentasie gewys omtrent 82%). Alhoewel dit goed klink, en ek heel gelukkig is daaroor, verwag hulle nie werklik minder van 'n mens hierdie kant nie, aangesien die simbole soos volg beskryf word: A – Good pass, B – Pass C – Low pass D en laer – mense praat nie werklik hieroor nie... So om 'n lang storie kort te maak, akademies gaan dit nog heel goed met my. Ek sien uit na die jaar wat amper begin. Ek vermoed daar wag weer lang ure en laat nagte (afgewissel met vroee oggende), maar dit is maar hoe dit gaan. Level 2 soos wat hulle die tweede jaar noem is minder intens as die eerste jaar, en in die tweede semester van hierdie jaar begin ons 'electives' te kies. Dan moet ons begin besluit in watter deel ons wil 'spesialiseer' met die skripsie in gedagte. Ek sal nog my opsies oorweeg voordat ek daardie besluit kan maak.

Finansies

Ek leef nog in dollars. Die VSA het steeds nie besluit om die Suid-Afrikaanse Rand as geleenheid aan te neem nie. Ek weet werklik nie hoekom nie. Ek het die saak vir die Rand so duidelik gestel in my vorige 14 briewe aan die George Bush, maar ek vermoed hy is te besig om Irak te stabiliseer (of is dit nou destabiliseer – ek kan regtig nie meer byhou nie) so ek is geduldig met daardie veroek. Hulle sukkel al soveel jare om die lig te sien rakende 'imperial' vs 'metric' so dit mag hulle dalk 'n tydjie neem om die Rand idee te aanvaar. Ek kan wag. Dinge is steeds relatif duur hierdie kant wanneer ek my aankope in rand probeer doen, maar ek is vas oortuig dat dit goedkoper is om hier te leef relatief tot inkomste. (Ek het hier 'n hengse lang woordsom gehad wat verduidelik hoe skoonmakers hierdie kant makliker kan uitkom met hulle finansies as skoonmakers in SA (sonder enige inkomste uit siviele eise a.g.v. die "Reitz Walg-video"*) en toe besluit om dit te delete, so vat maar net my woord daarvoor...

Sosiaal

Soos tyd aangaan het die mense in die klas mekaar beter leer ken, en so groei die vriendskappe maar. Aangesien die meeste van hulle se waardes en idees oor die lewe ens. radikaal van myne verskil maak dit die ontwikkel van dieper vriendskappe ietwat moeilik, maar vir nou is dit goed genoeg. Op 'n beter noot, Elserie het vir omtrent 'n maand by my kom kuier. Was dit nou nie super aangenaam nie! Vandat ek hier gekom het, het ek nog nie iemand gehad om al die nuwe en vreemde dinge mee te deel nie. (ook weer terug na die waardes en lewensbeskouing). Dit was lekker om hierdie dinge met iemand te deel, en vir haar New York te gaan wys ens. Ons het ook vir 3 dae en 2 aande in Las Vegas gaan uithang. Daardie is glad nie 'n heilsame plek nie. Dis asof mens permanent geestelik naar voel, maar dit is tog wat mens verwag – hoe anders. Waar ander plekke in die VSA (SA is glad nie onskuldig in hierdie opsig nie – internasionale toestand) hul selfsugtige, winsgedrewe, plesiersoekende motiewe wegsteek agter mooi bemarkingsposters en vriendelike klientediens kan ek dit wel vir Las Vegas gee – jy kry wat jy verwag en watookal jy wil he kan jy daar kry mits jy die kredietkaart kan uithaal of die toorwoorde "put it on my room" ken. "Whatever happens in Vegas... follows you home on your credit card statement". Daar is 'n heilsame eerlikheid oor die plek se onheilsaamheid – snaakse ironie wat maak dat die uitstappie daarheen uiteindelik heel heilsaam was. Verder het ons ook Boston en Cambridge verken, Le Corbusier, Alvar Aalto, Frank Gehry, Steven Holl, Eero Saarinen ens se geboue gesien. Die Freedom Trail geloop en meer oor Amerika se geskiedenis geleer – Boston is mos die "Birthplace of Independence" so indien mens belangstel in die Vryheidsoorlog en baie patrioties wil voel is hierdie die plek om te kom. Elserie was nog op die 4^th of July hier, so ons het mooi vuurwerke gesien – nogal begelei deur die Boston Pops klassieke orkes. Heel mooi gewees. Verder het ons die Duck Tours gedoen, 'n 2de wereld oorlog (?) boot/kar voertuig wat deur Boston ry en jou al die geskiedkundige dinge wys. Ons het die kroeg van Cheers gesien (net betyds gebore om die te onthou) en dan nog 'n hele klomp ander plekke. Dit word die Duck Tours genoem want die voertuig ry op 'n tyd in die rivier in en dan vervolg die toer op die rivier.

Geestelik

Baie baie baie dinge om te vertel, te bespreek, te noem, te ondersoek ens. Soveel so dat dit 'n individuele e-pos van belangstellendes gaan vereis (asook 'n heel ander Blog inskrywing...)

Werk

Ek werk tans nog by die Daylighting Lab hier by MIT. Dit is deel van die Building Technology program. Die wat belangstel kan dit google. Ons doen navorsing en maak 'tools' rakende alle aspekte van daylighting – maniere on daglig in geboue in te kry om sodoende energie te bespaar. In kort: Lig in temperatuur uit (of in afhangende van die seisoen). Nie so maklik soos wat dit klink nie, maar werklik ook nie so moeilik nie.

Opsomming en gevolgtrekking

Dit gaan nog goed met my. Ek vermoed dit vat omtrent 9 maande tot 'n jaar om gewoond te raak aan 'n nuwe plek. Ek voel gemaklik in die winkels en strate en voel nie meer soos 'n 'dumb foreigner' nie, alhoewel ek dit steeds regkry om vir 'n uur in die reen te verdwaal. (soos 'n tipiese man sal ek aanhou loop sonder om vir myself te erken ek is verdwaal met slegs my onfeilbare gevoel vir rigting om my te lei. Na 'n uur het ek na my innerlike vrou (baie beperkte innerlike vrou natuurlik, ek noem haar ook 'the voice of reason' of 'common sense' nie dat sy enigsins common is nie.) geluister en my gps uitgehaal. Binne 15 minute het die (vroulike) gps stem my gekry tot waar ek wou wees...

En met dit sal ek eindig vir nou.

My beste wense, liefde en groete.

G

Ek leef nog...

Net om vir almal te sê ek leef nog. Die semester is nog 3 weke lank dan het ek somer vakansie, so vir die laaste 3 weke sal ek maar stil wees. Belowe ek sal nuwe dinge oplaai sodra ek vakansie het. Goeie dinge is die moeite werd om voor te wag. Dankie vir almal wat gereeld inloer. Ek waardeer dit baie.

G

Uiteindelik - Sommer klomp dinge

Ek sien dit is al meer as 'n maand vandat ek laas iets op die Blog ge'post' het. Nou verstaan ek waarom almal aanhou sê ek moet iets oplaai... Ek verstaan julle frustrasie: Ek lees ook Volksblad en Die Beeld en selfs die Rapport online, en wens elke keer dat ek iets sal lees wat waarde tot my lewe sal toevoeg, maar elke dag is dit maar dieselfde. So om te verhoed dat ek nou in politiek en die wesenlike van die hiper-liberale Afrikaner se skaapkraal gaan rondkrap, wend ek myself tot dinge 'closer to home'. (waar ek tans bly natuurlik...). Iets wat hopelik meer om die lyf het as die super insiggewende artikels in ons daaglikse dagblaaie...

Soos gewoonlik het die werk by my nog nie minder geword nie. Ons kry elke dag 'n nuwe maatemmer vol uitdagings - ingestamp, opgestapel en oorlaai. Gelukkig beskou ek nie meer slaap as 'n noodsaaklike aspek van my bestaan nie, so ek het nou 8 ure meer om in te werk. Nogal indrukwekkend hoeveel mens gedoen kan kry in 24 uur. Ek moet regtig iemand in SA vra om my 'n paar Bar-one's te stuur ek sal kan doen met 25 uur dae. Ek kla nie, ek weet dit gaan met almal woes - almal het baie werk, en ek hoor by Elserie dat die 3de jaar argitektuur studente ook baie min slaap (selfs nog minder as ek - vermoed ek), maar dit is mos maar 'n student se lewe. Om op te som - ten spyte van die harde werk gaan dit goed. Ek leer baie en doen nog heel goed so ek kla nie.

Vir die wat nog nie gehoor het nie, ek het werk gekry vir die somer vakansie. Oor ongeveer 8 weke eindig my 2de semester by MIT en dan begin die immergewilde 'summer holiday'. Vir die algemene student beteken dit 3 maande van vryheid, son en bittermin akademiese verpligtinge. Ek kon seker ook daardie opsie gekies het, maar siende dat die meeste van my kollegas ('klasmaats' met net nie daardie 'graduate school' gevoel nie) gedurende vakansies werk het ek ook besluit om dieselfde te doen. Die enigste probleem is dat indien ek wel 'n werk kry ek saam met my eerste salaris tjek 'n komplimentêre vlug terug SA toe (komplimente van die VSA regering natuurlik) sal ontvang aangesien internasionale studente nie buite die universiteit mag werk nie. Ek verstaan hierdie punt heeltemal want indien die internasionale studente wat wettiglik in die VSA is gaan begin werk, sal daar geen werk oor wees vir al die onwettige Meksikane en Etiopiers nie... (grap net - weet dit is 'n swak smaak grap, maar ek kon nie anders nie.) Ek is darem nie heeltemal verbied om te werk nie, solank MIT my tjek onderteken mag ek werk, so soos 'n goeie Afrikaner het ek gedoen wat enigiemand in my posisie sou doen; 5000 emails uitgestuur na elke navorsingsgroep by MIT in wie se werk en effens belangstel en myself heelhartig aanbeveel. Sommige noem dit Spamming, ander noem dit 'om jouself aan iemand op te dring', ek noem dit 'job creation'. Ek het gevra en ek het ontvang. Ek het werk gekry by een van die Building Technology groepe wat spesifiek werk op die onderwerp van 'daylighting'. Hulle fokus op tegnologie om beter gebruik te maak van daglig. Om dit baie eenvoudig te stel, hoe meer ons gebruik kan maak van daglig in ons geboue, hoe minder hoef ons gebruik te maak van elektrisiteit. Daglig, oftewel sonlig (direk of indirek) word egter ook met hitte en 'n hele klomp ander, somtyds onaangename dinge geassosieer, so dadelik moet 'n manier uitgevind word om lig in te bring, maar hitte uit te hou. Saam met dit moet ons gereedskap ontwerp en beskikbaar stel wat argitekte kan gebruik om akkuraat kan bepaal hoe hul geboue ten opsigte van daglig sal reageer - hierdie is meestal sagteware. My werk sal fokus op die saamstel van 'n tipe databasis wat gebruik kan word om die verskillende tegniese apparate en venster behandelings (films ens) wat tans beskikbaar is te organiseer en saam met die tegniese inligting en tekeninge te 'file'. Geen argitek of ontwerper wil kosbare tyd mors om self 15 verskillende maatskappe te skakel om uit te vind of hulle dalk iets het wat hom (of haar) kan help nie. Dit is waar ons dan inkom - die databasis sal online wees, en sover ek verstaan gratis.

So vir twee maande gaan ek dalk soos 'n normale mens kan werk - klink vir my of dit 'n 9 - 5 werk kan wees met naweke af, so vir my is dit amper soos vakansie - en ek word nog betaal ook, bonus! Vir die van julle wat opgelet het is daar dus 1 maand oor wat ek nie gaan werk nie en wel vakansie het - en in daardie maand verwag ek 'n baie spesiale gas vanuit Suid-Afrika, dit is nou indien die Amerikaanse regering vir haar 'n visum sal gee... (Ek het 1 volle week nodig om my bachelors flat skoon te maak, nog 'n bed te organiseer, nog 'n stel eetgerei, borde en koppies aan te skaf omdat ek tot op hede geleef het soos... soos 'n bachelor natuurlik. O, ja ek moet ook 1 stel beddegoed koop, want ek slaap al vir amper 6 maande in 'n slaapsak. Ek is fine daarmee, maar 'n kuiergas moet darem regte beddegoed kry om op te slaap.)

Ek verneem dinge in SA raak al koeler, net soos dinge aan hierdie kant warmer begin raak. Nog nie werklik tot so 'n mate dat mens dit sal agterkom nie, maar die sneeu is weg en dit sal binnekort volledig lente wees. Aangesien ek net die stertkant van die somer tydens my aankoms in herfs hier beleef het weet ek nie werklik hoe die somer is nie, maar soos ek kan onthou en wat mense my vertel raak dit baie warm, maar is dit ook 'n baie mooi plek om te sien selfs al is dit warm. Klink my dit is baie groen ook.

Ek kan nog vir bladsye aan gorrel oor wat hier aangaan, maar ek moet seker begin afsluit. Ek weet ek het nie veel gesê wat nuus is nie, maar nuus hier is maar werk. Ek sal binnekort weer probeer om iets op te laai - dalk 'n paar foto's of drie. Tot dan, hier is twee 'links' waarheen julle kan gaan. (Dit is links bo - die nuwe links) Die eerste is ons klas se 'persoonlike' blog. Die naam 'missed opportunities' spruit uit 'n term wat een van ons 'starchitect' dosente gereeld gebruik om ons projekte se menigte swakpunte mee op te som. Dit is darem nie suiwere gemors nie (alhoewel dit soms is), maar meer net 'n geleentheid wat gemis is... Die tweede link gaan na my online dorpie - net iets wat ek ontdek het op die internet. Hoe meer mense die dorpie 'besoek' hoe vinniger groei hy. ('n nuttelose tydverdryf natuurlik...)

Elkgeval hier is dit.

Laat dit goed gaan daar met almal. Indien julle iets spesifieks wonder, e-mail my asseblief. Ek vat gewoonlik nie langer as 'n week om te antwoord nie : ) . Dankie vir die ondersteuning, gebed, biltong en beskuit. (pick die bedanking wat by jou pas...)

Groete, liefde en alles van die beste, (kies weer die een wat by jou pas, indien jy onseker is vat sommer al 3, daar is genoeg vir almal!)

G

Koud...

Het vandag 'n nuwe woord geleer - Arctic wind...
Dit beteken -9 grade oppad klas toe - sonder die wind chill factor ingereken...

Geniet die somer!

Weer terug...

Na 'n woes lekker kuier by die huis, is dit maar weer terug werk toe... Baie dankie aan almal wat my kuier so lekker gemaak het - baie sleg om julle almal weer daar te los, maar wie weet, dalk kom kuier ek gou weer...
Aan almal wat ek nie gesien het met my kuier nie (of die wat ek baie min gesien het), baie jammer daaroor.

My totale reistyd vandat ek by my Bloemfontein huis weg is, totdat ek by my VSA huis ingestap het was 'n totale 48 ure. Gelukkig het ek darem die naweek gehad om te herstel (alhoewel ek eintlik 'n week sou waardeer...). Elkgeval, genoeg vir nou. Ek laai gou weer iets op. Mooi bly almal...